Desde a Plataforma Avanza Santa Comba queremos denunciar o lamentable estado de abandono no que se atopa a pista de fútbol sala de Boaña, na parroquia de Castriz, unha instalación pública que debería estar en condicións para o seu uso por parte da veciñanza.
Comprobamos que as verxas de peche do recinto presentan un importante deterioro debido á falta de mantemento, mentres que as porterías están completamente oxidadas, ofrecendo unha imaxe de deixadez impropia dun espazo deportivo municipal.
Ademais, queremos facer especial fincapé na abundante maleza que invade a contorna da pista e na acumulación de lixo e residuos en distintos puntos do recinto. Esta situación non só prexudica a imaxe da instalación, senón que tamén dificulta o seu uso e demostra a falta de atención por parte do Concello.
Consideramos inadmisible que unha instalación pública permaneza nestas condicións durante tanto tempo. Os veciños e veciñas da parroquia de Castriz merecen contar cun espazo deportivo limpo, seguro e ben conservado, especialmente para que a mocidade poida desfrutar del con todas as garantías.
Por iso, esiximos ao Goberno municipal que actúe de maneira inmediata, levando a cabo labores de limpeza, desbroce, retirada do lixo e reparación ou substitución dos elementos deteriorados. Manter en bo estado as instalacións públicas non é unha opción, senón unha obriga coa cidadanía.
Seguiremos denunciando todas aquelas situacións de abandono que afecten aos nosos espazos públicos e reclamando solucións para que Santa Comba conte coas infraestruturas que a súa veciñanza merece.
